جنسی ہراسانی معاملہ: 15 جون کو پولیس کرے گی چارج شیٹ پیش

دہلی:ریسلنگ فیڈریشن آف انڈیا  کے سابق صدر برج بھوشن شرن سنگھ پر جنسی ہراسانی کا الزام لگانے والی چھ خواتین ریسلرز میں سے چار نے دہلی پولیس کو آڈیو اور ویژول ثبوت فراہم کیے ہیں۔دہلی پولیس کے ایک اہلکار نے دعویٰ کیا کہ دونوں شکایت کنندگان نے برج بھوشن کے خلاف اپنے الزامات کو ثابت کرنے کے لیے کافی ثبوت فراہم نہیں کیے تھے۔ تاہم دہلی پولیس نے اس بیان کی تصدیق نہیں کی ہے۔دو خواتین پہلوان، ایک بین الاقوامی ریفری اور ایک ریاستی سطح کے کوچ نے پولیس کے سامنے پہلوانوں کی حمایت میں گواہی دی ہے۔ اس کی بنیاد پر پولیس 15 جون کو چارج شیٹ پیش کرے گی۔ اس معاملے میں کیس کی دفعات کے لیے ایڈوائزری لی جا رہی ہے۔دہلی پولیس بالغ پہلوانوں کے معاملے میں 15تاریخ کو چارج شیٹ پیش کرے گی۔ ذرائع کے مطابق پولیس نابالغ پہلوان کے معاملے میں کلوزر رپورٹ درج کر سکتی ہے۔ نابالغ پہلوان نے جنسی زیادتی کے الزامات واپس لے لیے ہیں۔
پہلوان ونیش پھوگٹ نے برج بھوشن اور پہلوانوں کے جھگڑے میں کہا کہ ہم 15 جون کو چارج شیٹ آنے کا انتظار کر رہے ہیں۔ اس کے بعد تحریک کے حوالے سے بڑا اعلان کریں گے۔ ایک نیوز ایجنسی کو دیے گئے انٹرویو میں ونیش نے کہا – مجھے وزیر اعظم کی خاموشی سے دکھ ہوا ہے۔ جب پہلوان وزیر کھیل انوراگ ٹھاکر سے بات کر رہے تھے، وہ فون پر مصروف تھے۔ انھیں میرے مسائل سننے میں کوئی دلچسپی نہیں تھی۔
وزیر کھیل انوراگ ٹھاکر نے کچھ دن پہلے پہلوانوں سے بات کی تھی۔ جس میں یقین دہانی کرائی گئی تھی کہ کیس کی چارج شیٹ 15 جون کو پیش کی جائے گی۔