حیدرآباد: شہر حیدرآباد اور اس کے اطراف کے علاقوں میں کہر کی گھنی چادر کے نتیجہ میں گاڑیوں کی نقل وحرکت متاثرہورہی ہے اور حالیہ دنوں کے دوران اس کہر کے سبب کئی حادثات بھی پیش آچکے ہیں جن میں کئی افراد ہلاک ہوئے ہیں۔صبح میں کہر کے نتیجہ میں چہل قدمی کرنے والوں کے ساتھ ساتھ دفاتر کو جانے والوں کو شدید مشکلات کا سامنا ہے۔محکمہ موسمیات کا کہنا ہے کہ شہر اور اس کے اطراف کے علاقوں میں آئندہ چاردنوں تک ایسی ہی صورتحال برقرار رہے گی۔کہر کی وجہ سے خراب روشنی کی صورتحال پیداہوگئی ہے اور کئی مقامات پر گاڑیوں کی نقل وحرکت پر اس کا بُرا اثر پڑا ہے۔سبزی فروش،دودھ فروخت کرنے والے، ہاکرس کو شہر پہنچنے میں دشواریوں کا سامناکرناپڑرہا ہے۔حیدرآباد کوجوڑنے والی کئی اہم شاہراہوں میں بھی کہر کی گھنی چادر دیکھی جارہی ہے۔ سڑکوں پر دیگر گاڑیوں سے فاصلہ نہ بنائے رکھنے سے بھی حادثات پیش آرہے ہیں۔ ہنگامی حالات میں بریک لگانے کے لئے گاڑیوں کے درمیان جگہ بھی نہیں دیکھی جارہی ہے۔