معروف و مشہور شوشل میڈیا ء سائٹ فیس بک نے درجنوں جعلی روسی اکاؤنٹس بند کرنے کے ساتھ ساتھ ایک ایسے نیٹ ورک کو بھی بند کرنے فیصلہ کیا ہے جو امریکی ووٹرز کے لیے سیاسی پیغامات بھیجنا چاہتا تھا۔ اس نیٹ ورک کا تعلق ایک روسی انٹرنیٹ ایجنسی کے ساتھ بتایا جا رہا ہے ۔
اس نیٹ ورک کے تحت ایک ایسی فرضی تنظیم قائم تھی، جس کا مقصد سابقہ امریکی صدارتی الیکشن کے دوران تنازعاتی اور گڑ بڑ کی کیفیت پیدا کرنا تھا۔ فیس بک انتظامیہ نے اعتراف کیا ہے کہ اس فرضی تنظیم کے پلیٹ فارم سے سن 2016 کے صدارتی انتخابات کے دوران ایک سو چھبیس ملین امریکی شہریوں تک پہونچنے میں کامیابی ملی تھی۔
گزشتہ مہینوں کے درمیان فیس بک کی انتظامیہ کو جعلی اکاؤنٹس کے سلسلے میں باربار تنقید کا سامنا کرنا پڑا رہا ہے ۔ یہ تنقید خاص طور پر روسی جعلی اکاؤنٹس کے سلسلے میں تھی کہ جن کے ذریعے سن 2016 کے صدارتی انتخابات کے دوران غلط اطلاعات پھیلائی گئی تھیں۔
2018 میں امریکی وزارت انصاف نے انٹرنیٹ ریسرچ ایجنسی پر الزام عائد کیا تھا کہ اس نےجعلی افراد کے اکاؤنٹس کا استعمال کر کے سوشل میڈیا پر غلط معلومات پھیلائیں اور اس طرح امریکی رائے عامہ پر اثر انداز ہونے کی کوشش کی تھی۔
وزارت انصاف نے اس ایجنسی پر یہ الزام بھی لگایا کہ ایسی کارروائیوں کے ذریعے امریکی معاشرے میں سیاسی اور سماجی معاملات پر عام لوگوں کو تقسیم کرنے کے ساتھ ساتھ منقسم آراء کا حامل بنانے کی کوشش بھی کی گئی تھی۔
اسی سلسلے میں سوشل میڈیا کے ماہرین نے ایک رپورٹ جاری کی ہے۔ اس رپورٹ میں واضح کیا گیا کہ کم از کم پچاس اکاؤنٹس ایسے تھے جو انسٹا گرام پر سرگرم تھے اور ان میں سے نصف سن 2016 کے امریکی انتخابات میں فلوریڈا سے فرضی اور جعلی اطلاعات پھیلانے کا سلسلہ جاری رکھے ہوئے تھے۔ امریکی حکام پہلے ہی سن 2020 کے انتخابات میں مبینہ مداخلت کا انتباہ جاری کر چکے ہیں۔
اس انتباہ کی روشنی ہی میں فیس بک نے تازہ فیصلہ کیا ہے۔ فیس بک کے مطابق اُن میسجز پر لیبل لگائے جائیں گے جو کسی ایسے ملک سے جاری کیے گئے ہوں گے جہاں میڈیا ریاست کے مکمل کنٹرول میں ہے۔
Also read