حمیرہ عالیہ
1307 برس گزر گئےاس واقعے کو جس نے اسپین کی تارخ بدل ڈالی تھی۔آج ہی کے دن 29 اپریل 711ع کو طارق بن زیاد اپنے 7 ہزار سواروں کے ساتھ شمالی افریقہ سے اندلس کی مہم پر روانہ ہوا تھا۔۔۔۔۔وہ اندلس جس میں آج کل پرتگال اور ہمارے خوابوں کی سرزمین اسپین واقع ہیں۔۔۔۔۔۔اسپین۔۔۔۔جو کبھی ہمارا ہوا کرتا تھا۔۔۔۔کتنی ہی مشکلوں کو پار کر کے طارق نے اسپین فتح کیا تھا۔۔۔۔یاد ہے آپ کو۔۔۔۔جب اندلس کے ساحل پر پہنچتے ہی طارق نے اپنی کشتیوں میں آگ لگا دی تھی۔۔۔۔زمین حیران تھی۔۔۔۔آسمان ششدر۔۔۔۔لوگ دم بخود یہ عجیب و غریب نظارہ دیکھ رہے تھے۔۔۔۔ایسا بھی کوئی کرتا ہے۔۔۔۔اونچے اونچے شعلے اٹھ رہے تھے اور جہاز جل رہے تھے۔۔۔۔اب واپسی کا کوئی راستہ نہیں۔۔۔۔وہ عزم کر کے آئے تھے کہ اندلس فتح کر کے ہی جانا ہے۔۔۔۔ورنہ یہیں مر جانا ہے۔۔۔۔شکست کسی طور پر قبول نہیں۔۔۔۔۔اور طارق تو تھا ہی غازی۔۔۔۔پراسرار بندہ۔۔۔۔جس کی ٹھوکر سے صحرا اور دریا کانپتے تھے۔۔۔۔۔اور دریا اس کی ہیبت سے سمٹ جاتا تھا۔۔۔۔ہاں وہی طارق بن زیاد جو موسی بن نصیر کاآزادکردہ بربر غلام تھا۔۔۔۔اس نے اندلس کی بادشاہی کے پرخچے اڑا دئیے تھے۔۔۔۔۔
اور پھر تاریخ نے وہ منظر بھی دیکھا جب طارق نے شہنشاہ راڈرک کے ایک لاکھ کے لشکر کے سامنے اپنی بارہ ہزار کی فوج اتار دی۔۔۔۔اس فوج کے ہر شخص کے دل میں ایک الگ ہی جذبہ تھا۔۔۔۔علامہ اقبال کہتے ہیں نا۔۔۔۔
دوعالم سے کرتی ہے بیگانہ دل کو
عجب چیز ہے لذت آشنائی
اور یہ وہی لذت تھی جس نے راڈرک کے ٹدی دل جیسے لشکر کو پسپا ہونے پر مجبور کردیا۔۔۔۔اور بربر طارق اس جانبازی سے لڑا کہ اس نے راڈرک کو شکست دے دی۔۔۔۔وطن سے دور۔۔۔۔کمک سے مایوس۔۔۔۔مختصر اسلحے۔۔۔۔لیکن بے پناہ جذبہ۔۔۔۔طوفان جیسا جوش۔۔۔۔کون سی محبت تھی۔۔۔جس نے انہیں کشتیاں جلانے سے بھی خوفزدہ نہ کیا۔۔۔۔اتنی محبت۔۔۔۔اتنا جذبہ۔۔۔۔وہ بھی بنا کسی لالچ کے۔۔۔۔کیسے انسان تھے وہ؟؟؟؟
پھر طارق رکا نہیں۔۔۔۔اندلس کے بعدکاونٹ جولین کی رہنمائی میں اسیجہ۔۔۔۔مغیث رومی کی سربراہی میں قرطبہ۔۔۔اور پھر مالقہ۔۔۔غرناطہ۔۔۔۔موسی بن نصیر بھی طلیطلہ میں طارق سے آملے۔۔۔۔اور پھر شمالی اسپین۔۔۔سرقونہ۔۔۔۔اراگون۔۔۔اور بارسلونہ بھی فتح ہو گئے۔۔۔۔وہ سارا علاقہ ہمارا ہو گیا تھا۔۔۔مسجد قرطبہ میں سنہری روشنیاں دمکتی تھیں۔۔۔۔۔اور جبل الطارق پر لوگ طارق کی بہادری کی داستانیں سناتے تھے۔
لیکن یہ وقت۔۔۔۔بہت ظالم ہے۔۔۔۔۔اور پھر اللہ تو سب کا بادشاہ ہے۔۔۔۔اس کا کوئی کام مصلحت سے خالی نہیں ہوتا۔۔۔۔لیکن بعض وقت وہ مصلحتیں ہم انسانوں کی سمجھ سے بالاتر ہوتی ہیں۔۔۔۔۔خلیفہ ولید بیمار ہوئے اور ان کے انتقال کے بعد خلیفہ سلیمان نے ذاتی رنجش کی بنا پر موسی بن نصیر کو قیدخانے میں ڈال دیا۔۔۔۔وہ شخص جس نے بربر جیسی غیر مہذب اور وحشی قوم کو ایک منظم فوج کی شکل میں یکجا کیا تھا۔۔۔۔۔جس نے طارق کو اندلس کی مہم پرروانہ کیا تھا۔۔۔۔وہی شخص حج کے زمانے میں چہرہ چھپا کر بیڑیاں پہنے بھیک مانگا کرتا تھا۔۔۔۔تاکہ تاوان کی رقم ادا سکے۔۔۔۔
اور طارق۔۔۔۔جس کے سینے میں عزم تھا۔۔۔۔۔جس کی نگاہیں تلوار تھیں۔۔۔۔۔جس نے اسپین فتح کر کے اسے اپنے خلیفہ کے قدموں میں ڈال دیا تھا۔۔۔۔وہ طارق جس نے راڈرک کو دریابرد ہونے پر مجبور کردیا تھا۔۔۔۔وہی طارق گمنامی کے اندھیروں میں ایسا گم ہوا۔۔۔۔کہ پھر کبھی نہیں ملا۔۔۔۔لیکن انسان کا وجود معنی نہیں رکھتا۔۔۔۔اس کے کارنامے یاد رکھے جاتے ہیں۔۔۔۔اور جبل الطارق جسے آج ہم جبرالٹر کہتے ہیں۔۔۔۔وہ گواہ ہے۔۔۔کہ ہاں۔۔۔آیا تھا ایک شخص ایسا۔۔۔۔۔جس نے اپنی کشتیوں میں آگ لگادی تھی۔۔۔۔۔
ہم نے جب طارق کو جانا تو اس وقت عمر بمشکل بارہ سال رہی ہوگی۔۔۔۔۔جس وقت طارق ساحل پر اترا تھا۔۔۔۔ہم بہت خوفزدہ تھے۔۔۔۔پتہ نہیں آگے کیا ہو؟؟؟؟
اور جب اس نے اپنی کشتیوں میں آگ لگادی تو ہمارے رونگٹے کھڑے ہوگئے تھے۔۔۔۔پورے بدن پر لرزہ طاری ہوگیا تھا۔۔۔۔۔یہ کیا کیا طارق تم نے؟؟؟؟اب گھر واپس کیسے جاوگے؟؟؟؟لیکن طارق کو واپس جانا ہی کب تھا۔۔۔۔وہ بارہ سال کی بچی طارق کے فیصلوں کو کیا سمجھ پاتی۔۔۔۔۔
اور پھر قدم قدم پر طارق نے ہمیں بہت رلایا۔۔۔۔جب اس نے پہلا خطبہ دیا۔۔۔۔جب اس بوڑھی عورت نے اس کے کاندھے کے تل کو دیکھ کر فتح کی پیشن گوئی کی۔۔۔۔جب راڈرک کو شکست ہوئی۔۔۔۔اور ایسجا کے محاصرے کے دوران جب ایک یہودی دوشیزہ نے طارق کو قتل کرنے کا ارادہ کیا اور طارق کے بلند کردار سے متاثر ہوکر خود ہی اپنا راز فاش کردیاتھا۔۔۔۔اور سب سے زیادہ تو اس وقت جب ایک ذرا سی نافرمانی کی بنا پر امیر موسی نے پورے لشکر کے سامنے طارق کو کوڑے مارے تھے…….بہت روئے تھے ہم۔۔۔۔اور طارق۔۔۔۔وہ خاموش رہا۔۔۔۔اف تک نہ کی۔۔۔۔۔اتنا ضبط؟؟؟کوئی کیسے کر سکتا ہے؟؟؟لیکن وہ کوئی نہیں تھا۔۔۔۔طارق بن زیاد تھا۔۔۔۔فاتح اندلس۔
ہمیں طارق خوابوں میں نظر آتا تھا۔۔۔۔۔کتنے ہی سال تک۔۔۔۔یوں لگتا تھا ابھی کہیں سے آجائے گا۔۔۔۔طارق کی ہی نسبت سے اسپین سے کچھ ایسی محبت ہوئی کہ اب تک کم نہیں ہوئی۔۔۔۔۔بہت شدت سے دل چاہتا ہے۔۔۔۔ایک بار بس ایک بار اسپین جائیں۔۔۔۔جبل الطارق پر کھڑے ہو طارق کی کشتیوں کے جلنے کی تپش محسوس کریں۔۔۔۔مسجد قرطبہ کی شان و شوکت ماضی کی آنکھوں سے دیکھیں۔۔۔۔بارسلونہ اور میڈرڈ کی گلیوں میں گھومیں۔۔۔۔۔اس وقت کے ساتھ۔۔۔۔طارق کی یادوں کے ساتھ۔۔۔۔۔اس غازی۔۔۔۔اس پراسرار بندے کو خراج عقیدت پیش کریں۔۔۔۔
اب بھی وہ محبت ختم نہیں ہوئی۔۔۔۔۔طارق نام اب بھی کہیں سنتے ہیں تو ایک دفعہ کے لئے پورے بدن میں جھرجھری سی دوڑ جاتی ہے۔۔۔۔ذہن یکلخت کئی سال پیچھے چلا جاتا ہے۔۔۔۔۔جہاں فاتح اندلس ساحل پر کھڑا پوری شدت سے خطاب کر رہا ہوتا ہے۔۔۔۔۔۔دل میں شدت لئے ہوئے۔۔۔۔عقیدت لئے ہوئے۔۔۔۔محبت لئے ہوئے۔۔۔۔۔کس کی؟؟؟۔۔۔۔۔صرف اور صرف اللہ کی۔
کاش ہمیں بھی ایسی محبت نصیب ہو جائے۔۔۔۔۔تو پھر زندگی ہی بدل جائے۔
ریسرچ اسکالر لکھنؤ یونیورسٹی
