… غزل …

محمد مجاہد سید لکھنؤ

گرم بازارئ محبت میں
دل کو دیکھا ہے اک مصیبت میں
قتل کر یوں نہ سایہ دیوار
نیند آنے لگی ہے فرقت میں
ہم بھی کیا چوبِ خشک صحرا ہیں
دھوپ ہی دھوپ ہے محبت میں
ہر بُنِ مو سے روشنی پھوٹی
یوں مزہ آیا ہم کو وحدت میں
کیا ابھی رنگ و بو کے مارے ہیں
کون ہیں مست ہیں جو کثرت میں
آنکھ اب اور کیا بھلا دیکھے
دیکھ کر اس کو ایسی خلوت میں
تنگ ہے دشت غم کا سناٹا
خود کو دیکھا ہے ایسی وحشت میں
اب تو بس سیل اشک باقی ہے
کبھی ہوتی تھی آگ حسرت میں
سید اب رنج بھی نہیں ہوتا
کیا اضافہ ہے دل کی حیرت میں