ٹانڈه/امبيڈکرنگر(نامہ نگار) لاک ڈاؤن نے پورے ریاست کے بنکروں کی حالت کو مزید خراب کردیا ہے۔ ان خیالات کا اظہار آج اترپردیش بنکرسبھا کے صدر حاجی افتخار احمد انصاری نے کیا۔ انہوں نے کہا کہ گزشتہ دو ماہ سے زیادہ عرصے سے ریاست میں لاکھوں پاورلوم خاموش ہیں اور اس کے ذریعہ تیار کپڑے بھی فروخت نہ ہونے سے ڈمپ پڑے ہیں۔ جس سے بنکر فاقہ کشی پر مجبور ہیں۔ انہوں نے کہا کہ ایسے حالات حکومت کو چاہئے کہ بنکروں کے لئے کچھ راحت دینے کی بات کرے، بلکہ اس کے برخلاف محکمہ بجلی کے ذریعے سے ہراساں کرنا ہی شروع کر دیا ہے۔ انہوں نے محکمہ بجلی پر الزام لگاتے ہوئے کہا کہ بجلی ریگولیٹری کمیشن کے ذریعہ منظور شدہ ٹیرف کے مطابق محکمہ بجلی کی جانب سے فلیٹ ریٹ بجلی کے بل کو نہ جمع کرنے کے بجائے محکمہ من مانے ڈھنگ سے اور بوگس بلوں کو بنا کر پاورلوم بنکروں کو قرضدار بنا رہی ہے۔ جس کی وجہ سے اب بنکروں کے پاس آندولن کے سوا اور کوئی دوسرا راستہ نہیں ہے، انہوں نے مزید کہا کہ لاک ڈاؤن کے سبب ریاست بھر کے پاورلوم پہلے سے ہی بند ہے، اگر محکمہ بجلی نے بنکروں کو ہراساں کرنے سے باز نہ آیا اور جبراً پاورلوم بنکروں کے پاس بک کو ختم کردیا۔ تو مجبوراً بنکر اپنے پاورلوم کو غیر معینہ مدت کے لئے لاک ڈاؤن کرنے پر مجبور ہو جائنگے۔ انہوں نے ریاست کے تمام بنکر نمائندوں کو اس کی اطلاع کرتے ہوئے کہا ہےکہ کورونا وبا اور لاک ڈاؤن کی وجہ سے کوئی ملاقات ممکن نہیں ہے اس لئے حاجی افتخار نےسبھی سے گزارش کی ہے کہ اس معاملے کو ایک میٹنگ کے طور پر لیں اورغورکرنے کے بعد آئندہ کی تحریک کا فیصلہ کرنے کے لئے اپنے قیمتی مشورے سے نوازیں۔