امریکی وزیر خارجہ اینٹونی بلنکن نے میانمار کی فوج پربغاوت کے خلاف مظاہروں کے پرامن شرکا پر طاقت کے اندھا دھند استعمال کا الزام عائد کیا ہے۔
امریکی وزیر خارجہ نے منگل کوجاپان کے دورہ کے موقع پر میانمار کے لیے متبادل لفظ’’ برما ‘‘ کا استعمال کرتے ہوئے کہا کہ برما میں فوج جمہوری انتخابات کے نتائج کومسترد کرنے کی کوشش کر رہی ہے اور پرامن مظاہرین کی آواز کو دبانے کے لئے طاقت کا وحشیانہ استعمال کر رہی ہے۔
دوسری جانب اقوام متحدہ کا کہنا ہے کہ میانمار میں فروری کے شروع میں فوجی بغاوت اور اقتدار پر قبضے کے بعد سے جمہوریت نواز مظاہرین کے خلاف کریک ڈان میں اب تک 149افراد مارے جا چکے ہیں،اسسٹنس ایسوسی ایشن فار پولیٹیکل پرزنرز (اے اے پی پی) کا کہنا ہے کہ میانمار میں اب تک فوجی کریک ڈائون میں 180سے زائد افراد مارے گئے جبکہ صرف اتوار کے روز 74مظاہرین مارے گئے۔