✍ اوصاؔف تماپوری
دیکھ رہا تسکین کا خواب
لمحہ لمحہ ہے گرداب
آخر میرے دل میں کیوں
تونے جگائے پیچ و تاب
اب کے دل کے موتی میں
باقی ہے کچھ آب وتاب
کود پڑے ہم ساگر میں
تیرے ساتھ ہوئے غرقاب
خود کو سمجھنے کی دُھن میں
دیکھ رہا ہوں خواب پہ خواب
تیری قربت ہے مشکل
تیری دوری ایک عذاب
دیکھ ذرا حالات تو دیکھ
اب کیا دوں میں تجھکو حساب
پانی کیسے نظر آئے
بھر گیا پھولوں سے تالاب
پل پل بدلے من کا رنگ
کون ہے اچھا کون خراب
دل سے آنکھ تلک اوصاؔف
پھیلا پھیلا آب ہی آب
Also read