طنزو_مزاح_کے_معروف_شاعر_اسرار_جامعی_کا انتقال

مجھ سے بڑا شاعر نہ ہوگا جامعی

ہند وپاکستان میں اور نہ قبرستان میں

طنز مزاح کے معروف اور منفرد شاعر اسرار جامعی آج صبح رضائے الٰہی سے وفات پا گئے ہیں.. انھوں نے مزاح کو پھکڑ پن اور ولگریٹی سے پاک کیا اور اپنی مزاحیہ شاعری سے ایک پوری نسل کونہ صرف یہ کہ متاثر کیا ہے بلکہ پیش رؤں کی کھینچی ہوئی لکیر کے آگے ایک ایسی لکیر کھینچی  جس کی توسیع کرنا نئی نسل کےلیے نہ صرف مشکل ہے بلکہ فی زمانہ ناممکن ہے. جہاں تک ان کے ’’ لیٹر بم ‘‘ کا سوال ہے اس نے مزاح کے فروغ میں جو نمایاں کردار ادا کیا ہے اس سے کوئی انکار نہیں کرسکتا ہے۔ مجروح سلطان پوری لکھتے ہیں  “عالمی ماحول کو دیکھتے ہوئے اگر آپ کے’’ لیٹر بم‘‘ سے میرے گھر میں خوف و حراس کی فضا تھوڑی دیر کے لئے پیدا ہو گئی تو کچھ غیر فطری نہ تھا ،بحر حال آپ کا یہ تشدد پسندوں کا طریقہ دیکھ کر میں نے بھی عافیت اسی میں دیکھی کہ تعاون سے کام لیا جائے۔‘‘شمس ارحمن فاروقی لکھتے ہیں ’’ہم لوگ انھیں علّامہ کہتے ہیں کیونکہ وہ شکل سے سیدھے اور اندر سے بڑے خطرناک ہیں ۔شاعروں اور استادوں کے وہ خاص دشمن ہیں۔‘‘پروفیسر شکیل الرحمن کی نظر میں ’’ اسرارؔ جامعی ’’ون مین آرمی ‘‘ ہیں۔

       اسراؔر جامعی کے بارے میں پروفیسر محمد حسن نے کہا ہے کہ ’’اسرار جامعی کہ یہاں طنز و مزاح کا تانا بانا فکر و احساس کی تازہ کاری سے بُنا جاتا ہے ۔‘‘ایک اور مضمون جو انگریزی کے اخبار میں شائع ہوا تھا ہمیں بتاتا ہے کہ کس طرح اس وقت کے مرکزی وزیر داخلہ ایس بی چوان کی افطار پارٹی میں اسرارؔ جامعی نے کھُل کر اس وقت کے سخت اور متعصب قانون ٹاڈا کے خلاف نظم سنائی کہ وزیر داخلہ کو بھی ماننا پڑا کہ ٹاڈا کا غلط استعمال ہو رہا ہے۔ اگلے دن ہندی کے بڑے اخبار جن ستّا نے اس واقعہ کو رقم کرکے لکھا کہ اسرؔار جامعی کے نظم سنانے کے بعد وزیر داخلہ نے مانا کہ ٹاڈا کا غلط استعمال ہو رہا ہے۔ اسی موقع پر انھوں نے تب بھی چٹکی لی کہ جب کہا گیا کہ سب کو بھائی چارے کے ساتھ رہنا چاہئے۔ ان کا یہ قطعہ تو عام ہو چکا ہے۔

 بھائی چارہ

کیا پتے کی بات کہہ دی جامعی اسرار نے

کیوں ادا کرنا پڑا ہے اس کا کفارہ ہمیں

بھائی چارے کا تو یہ مطلب نہ ہونا چاہئیے

ہہم تو ان کو بھائ سمجھیں اور وہ چارہ ہمیں

…………….

ہم ” جھانک “ بھی لیتے ہیں تو ہوجاتے ہیں بدنام

وہ ”جھونک “ بھی دیتے ہیں تو چرچا نہیں ہوتا

…………….

بیکار گر ہیں آپ تو اِک کام کیجئے

مکھن لگانے والوں میں کچھ نام کیجئے